ยามหน้าหนาว

หมู่เฮาสาวค้าง

ถึงขาดคู่ข้าง

แต่ยังม่วนใจ๋

ผ้าต้วบผ้าตุ๊ม

บ่ต้องแบ่งไผ

บ่มีคนใด

มาลู่ห่มผ้า

จะหลับลุกขวาย

เมื่องายเมื่อหล้า

บ่มีไผมา

ว่าฮ้าย

จะกลิ้งไปขวา

ตะแคงมาซ้าย

หรือดิ้นแหวกว่าย

บนเตียง

จะหลับขนฟื้อ

ไผบ่ยินเสียง

ขาดคู่นอนเคียง

มันดีแต๊เจ้า

จะกิ๋นกาแฟ

มาม่าต๋างข้าว

ไผบ่ว่าเฮา

ขี้คร้าน

กันอยากขึ้นมา

ก็ไปนั่งร้าน

บ่เปลื๋องแก๊สบ้าน

เฮาดี

จะกิ๋นน้ำพริก

แก๋งหอยแก๋งปลี๋

เปิ้นก็ตึงมี

ขายที่กาดหั้น

เฮาอยู่คนเดียว

รับรองบ่กลั้น

มีกิ๋นตึงวัน

บ่ซ้ำ

ตึงใจ๋ตึงก๋าย

สบายเจ่นล้ำ

บ่อึดบ่อ้ำ

อันใด

ฟังวิทยุ

ก็สบายใจ๋

บ่มีคนใด

มาลู่คลื่นเจ้า

จะผ่อทีวี

ช่องเจ็ดช่องเก้า

ผ่อต๋ามใจ๋เฮา

ชอบมัก

จะผ่อละคร

เรื่องบู๊เรื่องฮัก

หรือจักผ่อด้าน

กีฬา

จะฟังทิดทุ้ย

สาคร,หนานถา

ไผก็บ่มา

ว่าหยังเฮาได้

เปิ้นมีก๋ารงาน

บ้านเหนือบ้านใต้

ก็ดูต่างไป

แอ่วฟ้อน

บ่มีลูกผัว

บ่ได้เดือดร้อน

ว่าไผจะอ้อน

จะคอย

คนมีคู่นั้น

มันบ่น่าขอย

ไปศพไปปอย

ห่วงหลังห่วงหน้า

ห่วงคนอยู่หลัง

จะนั่งรอถ้า

จะกิ๋นหยังจา

บ่ฮู้

บึดจ่มเรื่องผัว

เดียวหนัวเรื่องจู๊

ปอบ่ได้อู้

เรื่องตาน

เลี้ยงลูกใหญ่แล้ว

ยังต้องเลี้ยงหลาน

ยุ่งอยู่กับงาน

กึ๊ดร่ำต่ำสร้าง

มีลูกก๋วนตั๋ว

มีผัวก๋วนข้าง

ตุ๊กข์บ่ได้วาง

ว่างพัก

พระเปิ้นยังสอน

ที่ไหนมีฮัก

มักมีทุกข์หั้น

ตวยมา

ได้ผัวเจ้าจู๊

ก็ทุกข์นักหนา

ได้ผัวขี้ยา

ก็น่ากลั๋วเจ้า

พ่องก็ทุกข์ใจ๋

ได้ผัวขี้เหล้า

นอนกับขี้เมา

โชคร้าย

พ่องก็ทุกข์ใจ๋

ได้ผัวขี้พ้าย

เซาะหาเงินส้าย

บ่ทัน

อยู่เป๋นโสดนี้

ก็ดีเหมือนกั๋น

เพียงแต่บางวัน

มันเหงาไปหน้อย

ส่วนใหญ่ก็ดี

บ่มีปมด้อย

บ่ต้องมาคอย

เป๋นทุกข์

หันเขาแต่งงาน

หัวหมุ้นก้นซุก

เป๋นสุขแบบยุ่ง